Day 2/365
يمكن الصورة تبان عادية للناس بس هي في الحقيقة صورة لحاجة مهمة جدا، صورة لميدان العباسية!!
ميدان ناس كتير بتعدي عليه بس محدش عاشه زي اللي كانوا في جامعة عين شمس او لعبوا رياضة في صالة عين شمس.
الذاكرة دي حاجة مبهرة جدا. ازاي ممكن تمشية بسيطة في شارع حفظينه يفكرنا بذكريات كتيير كدا.
يفكرنا بقد ايه كنا بنجري علشان نلحق محاضرتنا (او في حالتي كانت الامتحان كمان)، خناقة كل مرة علشان الاكل وفي الاخر ناكل سوري او كريب او كشري. يفكرنا بخروجات قررناها واحنا واقفين عند الميكروباص. بيفكرنا باجمل فطيرة سجق ممكن تتاكل (من عند المخبز اللي تحت الكبري)، بتفكرنا بفطار عظيم من عربية الفول.
الاهم من دا كله انها بتفكرنا اننا كبرنا! بس دي مش حاجة وحشة ! لان معنى اننا كبرنا اننا عملنا ذكريات جديدة. ذكريات حلوة ووحشة بس الجميل ان الموقف دا فكرنا ان اللحظات الحزينة بتتنسي واللحظات المهمة بتعيش معانا سنين.
مش مهم بكرا مخبيلنا ايه بس المهم اننا نقرر نتبسط بكل لحظة علشان نيجي بعدين نقول احنا عيشنا بجد ومجريناش ورا حاجات ملهاش لازمة لمجرد ان الناس قالت ان دا المفروض يحصل.
"الذكريات الجميلة نجم في السماء يضيء لنا، ودرة فخر تتلألأ، ونزين بها كلامنا، وناي نشدو به، وسفينة أحلام نركبها، ونبحر بها عبر الأيام الحاضرة بأمل إستعادتها في القادم من أيامنا."
يلا كفاية كدا علشان هنزل من الميكروباص 
Comments
Post a Comment